Bakı Dövlət Universiteti Şərqşünaslıq fakültəsi

08 may 2023-cü il tarixində Şərqşünaslıq fakültəsində Ümummili lider Heydər Əliyevin 100 illik yubileyinə həsr olunmuş urdu dili üzrə nitq müsabiqəsi keçirilib. Müsabiqə fakültə könüllülərinin təşkilatı dəstəyi ilə baş tutub. Nitq müsabiqəsində fakültənin Pakistan üzrə regionşünaslıq ixtisasının tələbələri iştirak ediblər. Ulu öndər Heydər Əliyevlə bağlı mövzular üzrə urdu nitqlər dinlənilib. Orta şərq dilləri və ədəbiyyatı kafedrasının professor-müəllim heyətindən təşkil olunmuş müsabiqə komitəsi çıxışları 10 ballıq qiymətləndirmə sistemi üzrə qiymətləndirmiş, sonda 4 juri üzvününün qiymətlərinin ədədi ortası nəticəsində qaliblər müəyyən edilmişdir. Müsabiqə ilə bağlı kafedra müdiri, prof. Mehdi Kazımov çıxış edərək, müsabiqənin əhəmiyyətindən söz açmış, dil üzrə tələbələrin bacarıqlarının artırılması ilə bağlı əsas məqamları iştirakçıların diqqətinə çatdırmışdır. Nəticələri açıqlamamışdan əvvəl dekan, dos. Aydan Xəndan tələbələrin çıxışlarını yüksək qiymətləndirmiş, bütün iştirakçılara uğurlar arzulamışdır. Müsabiqənin nəticəsinə əsasən, dördüncü kurs tələbəsi Zibeydə Babayeva birinci yerə, birinci kurs tələbələri Nəzrin Şahgəldiyeva ikinci yerə, Şövkət Eyvazova üçüncü yerə layiq görülmüş, kubok və sertifikatla mükafatlanmışlar. Sonda xatirə şəkilləri çəkilmişdir.