Bakı Dövlət Universiteti Şərqşünaslıq fakültəsi

25 oktyabr 2024-cü il tarixində Bakı Dövlət Universitetinin Şərqşünaslıq fakültəsinin Tələbə Gənclər Təşkilatının (TGT) təşkilatçılığı ilə “Xankəndinin keçmişi və gələcəyi:Tarixdən intibaha” adlı tədbir keçirildi. Tədbirdə Vətən müharibəsi iştirakçıları, fakültənin dekan müavini və birinci kurs tələbələri iştirak etdilər. Tədbir Azərbaycan Respublikasının Dövlət Himninin səsləndirilməsi ilə başladı. Daha sonra vətən uğrunda canından keçən şəhidlərin xatirəsi bir dəqiqəlik sükutla yad edildi. Dekan müavini Şahin Yusifli, Xankəndi şəhərinin tarixi barədə çıxış etdi. Şəhərin tarixi, yaranma məqsədləri, sonrakı talehi və gələcəyi ilə bağlı danışdı. Sonra, 44 günlük Vətən Müharibəsinin iştirakçıları, Həsən Yaqubov və Pərvin Abdullayevə söz verildi. Müharibə iştirakçıları keçdikləri döyüş yolu, çətinliklər, xoşbəxt və çətin anlar daxil olmaqla döyüşlərdəki xatirələrdən danışdılar. Tələbələrin sualları əsasında geniş məlumat təqdim edildi. Daha sonra “ Xankəndinin keçmişi və gələcəyi “ və “Qarabağ Universiteti” ilə bağlı videoçarxlar nümayiş edildi. Fikir mübadiləsi bitdikdən sonra, görüş yekunlaşdırıldı.