Bakı Dövlət Universiteti Şərqşünaslıq fakültəsi

Prof. M.D.Kazımov 18 avqust 1954-cü ildə Bakı şəhərində anadan olmuşdur. 1961-1971-ci illərdə 175 saylı Bakı şəhər orta məktəbdə təhsil almışdır. 1977-ci ildə Bakı Dövlət Universitetinin Şərqşünaslıq fakültəsinin fars şöbəsini bitirmişdir. 1976-1977-ci illərdə fars dili üzrə mütərcim kimi İranda işləmişdir. 1977-ci ildə BDU-nu bitirdikdən sonra həmin ildən etibarən 11 il ərzində Azərbaycan Milli Elmlər Akademiyasında əvvəlcə ictimai elmlər üzrə Elmi İnformasiya mərkəzində və sonralar EA-nın Şərqşünaslıq İnstitutunda fəaliyyət göstərmişdir. Şərqşünaslıq İnstitutunda kiçik elmi işçi, elmi katib, böyük elmi işçi vəzifələrində çalışmışdır. 1981-ci ildə namizədlik, 1990-cı ildə isə doktorluq dissertasiyasını müdafiə etmişdir.1988-ci ildən elmi-pedaqoji fəaliyyətini Bakı Dövlət Universitetində davam etdirməkdədir. 1994-cü ildən İran filologiyası kafedrasının professorudur. Hal-hazırda da Orta Şərq dilləri və ədəbiyyatı kafedrasının müdiridir.

1987-ci ildə Britaniya Akademiyasının dəvəti ilə Böyük Britaniyada elmi ezamiyyətdə olmuşdur. Burada o, müxtəlif kitabxanalarda saxlanılan Azərbaycanlı yazıçı, şair, mütəfəkkirlərin bir neçə qiymətli əlyazmalarını üzə çıxarmış, Edinburq şəhərindəki İslam Tədqiqatları Universitetində seminar aparmışdır.

1994-cü ildə ABŞ-ın «Ayreks» təşkilatı tərəfindən keçirilmiş müsabiqənin Respublika üzrə qalibi seçilmiş və 1995-ci ildə ABŞ-ın Sietl şəhərindəki Vaşinqton Universitetində elmi ezamiyyətdə olmuş, orada məruzələrlə çıxış etmişdir.

2009-cu ildə elm və təhsil sahəsində göstərdiyi xidmətlərə görə «Tərəqqi» medalı ilə təltif edilmişdir.

2019-cu il BDU-nun 100 illiyi münasibətilə yubiley medalı ilə təltif edilmişdir. 2021-ci ildə Azərbaycan Respublikasının Mədəniyyət Nazirliyi tərəfindən “Nizami Gəncəvinin 880 illiyi (1141-2021)” xatirə nişanı və AMEA tərəfindən Azərbaycan Respublikası Prezidenti İlham Əliyevin Azərbaycan Respublikasında 2021-ci ilin “Nizami Gəncəvi ili” elan edilməsi haqqında 5 yanvar 2021-ci il tarixli Sərəncamı ilə əlaqədar dahi şair və mütəfəkkir Nizami Gəncəvi irsinin tədqiqi və təbliği sahəsində xüsusi xidmətlərinə görə fəxri fərmanı ilə təltif edilmişdir.