“Şərqşünas məzunla görüş”

5 Noyabr 2024 07:28

Şərqşünaslıq fakültəsində BDU-nun 105 illik yubileyinə həsr olunan tədbirlər çərçivəsində “Şərqşünas məzunla görüş” adlı növbəti dəyirmi masa keçirilib.

04 noyabr 2024-cü il tarixində Bakı Dövlət Universitetinin (BDU) 105 illik yubileyi münasibətilə təşkil olunan tədbirlər silsiləsi çərçivəsində tanınmış türkoloq alim, yazıçı, kulturoloq, filologiya üzrə elmlər doktoru və professor Tofiq Məlikli ilə görüş keçirildi.

Tədbirin açılışında Şərqşünaslıq fakültəsinin dekan müavini Şahin Yusifli, professor Tofiq Məliklinin həyat və fəaliyyəti barədə qısa xülasə ilə çıxış etdi.

Daha sonra, Şərqşünaslıq fakültəsinin dekanı Aydan Xəndan çıxış edərək, professor Tofiq Məliklinin türkologiya elmindəki əhəmiyyətli töhfələrini, keçdiyi elmi yolu, elmi əsərlərini və tədqiqatlarına cəlb etdiyi şairləri vurğuladı.

Görüş zamanı professor Tofiq Məlikli, türk ədəbiyyatı və mədəniyyəti sahəsindəki tədqiqatlarından, eləcə də xaricdə keçən elmi və ictimai fəaliyyətindən bəhs etdi. O, 60-cı illərdə türkoloq olmağın çətinlikləri, elmi mühitin vəziyyəti, repressiyaların təsiri və o dövrdəki resurs çatışmazlığı haqqında məlumat verdi. Professor, həmin dövrdə elmin inkişafı üçün mübarizə aparmaq və öz tədqiqatlarını irəlilətməkdə qarşılaşdığı maneələrdən söz açdı. O, tələbələri elmi tədqiqatlar və mədəniyyət sahəsində gələcəyə körpü adlandırıldı. Eyni zamanda, şərqşünaslığın mühüm sahə olduğu qeyd edilərək, bu sahənin Azərbaycan mədəniyyəti və ədəbiyyatına olan təsiri vurğulandı. Professor tələbəlik xatirələrini bölüşərək, bu dövrdə qazandığı müsbət təcrübələrin onun elmi yolunda dəyərli olduğunu qeyd etdi. Gənclərə elmdə inkişaf etmək, ziyalı olmaq və cəmiyyətə faydalı bir insan kimi yetişmək üçün dəyərli məsləhətlər verdi.

Tədbirdə iştirak edən tələbələr professor Tofiq Məlikliyə müxtəlif suallar ünvanlayaraq, türkologiya sahəsinə dair yeni biliklər əldə etdilər. Bu görüş tələbələr üçün həm bir ilham mənbəyi, həm də professor Tofiq Məliklini görkəmli bir məzun kimi tanımaq baxımından dəyərli bir imkan oldu.