omanlı yazıçı Coxa Əl-Harsi ilə görüş keçirildi
Bakı Dövlət Universiteti Şərqşünaslıq fakültəsinin müəllim heyəti və tələbələrin iştirakı ilə Bakı Dövlət Universitetinin Elmi kitabxanasında "The Man Booker İnternational Prize" mükafatına layiq görülmüş omanlı yazıçı Coxa Əl-Harsi ilə görüş keçirildi. Görüşdə ərəb yazıçısı Coxa Əl-Harsi ərəbcədən Azərbaycan dilinə tərcümə edilmiş "Ayın qızları" kitabı haqqında, eyni zamanda digər əsərləri, öz həyatı və Oman məişəti haqqında fikirlərini də bölüşdü. Qeyd edək ki, kitabın tərcüməçisi Şərqşünaslıq fakültəsinin məzunları Aytəkin Qocayeva, redaktoru isə Rəşad Həsənovdur. Yazıçı sadəcə Ərəb ədəbiyyatı deyil, Dünya ədəbiyyatı və Azərbaycan ədəbiyyatı ilə bağlı fikirlərini də tədbir iştirakçıları ilə bölüşdü. N.Gəncəvi, M.Füzuli kimi Azərbaycanın dahi şairlərinə olan rəğbətini də xüsusi olaraq vurğuladı. Qurban Səidin “Əli və Nino” əsəri haqqında da xoş təəssüratlarını bölüşdü. Qeyd edək ki, Coxa Əl-Harsi Omanda və Böyük Britaniyada təhsil alıb. Edinburq Universitetində Klassik Ərəb Şeiri üzrə fəlsəfə doktoru dərəcəsi alıb. Hal-hazırda Omanın Sultan Qabus Universitetinin Ərəb dili və ədəbiyyatı kafedrasında dosentdir. Bundan əlavə, ərəb dilində üç hekayələr kitabı, üç uşaq kitabı və üç romanın müəllifidir. Görüşün sonunda Coxa Əl-Harsi Şərqşünaslıq fakültəsinin müəllim heyəti və tələbələrin suallarını cavablandırdı.
