Bakı Dövlət Universiteti Şərqşünaslıq fakültəsi

Şərqşünaslıq fakültəsində Ərəb filologiyası kafedrasının təşkilatçılığı ilə AMEA-nın Ziya Bünyadov adına Şərqşünaslıq İnstitutunun aparıcı elmi işçisi f.ü.f.d. Laura Orucovanın təqdimatında “Azərbaycanda ərəb dilçiliyinin inkişafı və bu sahəyə aid elmi-tədqiqat işləri” mövzusunda növbəti seminar keçirildi.

Ərəb filologiyası kafedrasının müdiri dosent Vüqar Qaradağlı tədbiri giriş sözü ilə açaraq məruzəçi haqqında seminar iştirakçılarına məlumat verdi, Laura xanımın XX əsrdə Azərbaycanda yaranan ərəbşünaslıq məktəbinin görkəmli nünayəndələrindən biri olduğunu, onun təcrübəsinin bütün auditoriya üçün maraqlı və faydalı olacağını bildirdi. Daha sonra söz f.ü.f.d. Laura Orucovaya verildi. O, mövzu ilə bağlı auditoriya qarşısında çıxış etdi, tələbəlik illəri, ərəb dilini ərəbşünaslıq məktəbinin banisi Ələsgər Məmmədovdan necə öyrəndikləri, daha sonra elmi fəaliyyəti, hal-hazırda AMEA -nın akademik Ziya Bünyadov adına Şərqşünaslıq İnstitutunda ərəb dilçiliyi sahəsində aparılan elmi-tədqiqatlar haqqında məlumatları seminar iştirakçıları ilə bölüşdü, müəllim və tələbələr tərəfindən verilən sualları cavablandırdı.

Tədbirin sonunda Şərqşünaslıq fakültəsinin dekanı dosent  Aydan Xəndan Laura Orucovaya maraqlı məruzəyə görə təşəkkür etdi, bu cür görüşlərin həm müəllimlərimiz, həm də tələbələrimiz üçün çox əhəmiyyətli və vacib olduğunu bildirdi. Sonda xatirə şəkilləri çəkildi.