Bakı Dövlət Universiteti Şərqşünaslıq fakültəsi

Görüşdə BDU-nun Beynəlxalq əlaqələr şöbəsinin müdiri Rauf Həsənov, fakültənin dekanı Aydan Xəndan, tədris işləri üzrə dekan müavini Tərlan Məlikov, Ərəb filologiyası kafedrasının müdiri Vüqar Qaradağlı, kafedranın müəllimi Könül Eyvazova, və Ayn Şəms Universitetinin İncəsənət fakültəsinin dekanı Hanan Kamel, Ərəb dili kafedrasının müdiri Manal Moharram, Şərqşünaslıq şöbəsinin müdiri Mohammed Hamid, Azərbaycan dili müəllimi Shza Mohammed və dekan müavini Mohammed İbrahim iştirak ediblər.

Şərqşünaslıq fakültəsinin dekanı Aydan Xəndan fakültənin tarixi, fəaliyyəti və beynəlxalq əlaqələri haqqında geniş məlumat verib. Daha sonra Ərəb filologiyası kafedrasının müdiri Vüqar Qaradağlı tədbir iştirakçılarını Ərəb filologiyası kafedrasının fəaliyyəti ilə bağlı məlumatlandırıb. Tərlan Məlikov və Könül Eyvazova fakültədə tədris olunan ərəb dilinin tədrisi və metodikası ilə bağlı fikirlərini bildirib.

Görüşdə BDU, xüsusilə də şərqşünaslıq fakültəsi ilə Ayn Şəms Universiteti arasında əməkdaşlıq əlaqələri, ortaq tədqiqat işlərinin aparılması, birgə elmi seminarların, ustad və onlayn dərslərin təşkili, xüsusilə də ərəb dilinin tədrisində universitetlərarası təcrübə mübadiləsi məsələləri müzakirə olunub. Tədbir iştirakçıları şərqşünaslıq sahəsində ikitərəfli əməkdaşlığın inkişaf etdirilməsində, ikili diplom proqramlarının həyata keçirilməsində maraqlı olduqlarını bildiriblər. Keçirilən müzakirələrdə iki universitet arasında memorandum imzalanması barədə ümumi razılığa gəlinib.