8 NOYABR - ZƏFƏR GÜNÜ
Şərqşünaslıq fakültəsində "8 noyabr - Zəfər günü" qeyd olunub. 07 noyabr 2023-cü il tarixində Şərqşünaslıq fakültəsində Tələbə Gənclər Təşkilatının təşkilatçılığı ilə dekanlıq, fakültənin 44 günlük Vətən müharibəsində iştirak etmiş qaziləri, I Qarabağ müharibəsi şəhidi Muradxan Gözəlovun valideyni, müəllim və tələbə heyətinin iştirakıyla 8 noyabr - Zəfər günü bayram tədbiri qeyd edilib. Tədbir Azərbaycan Respublikasının Dövlət Himninin səsləndirilməsi və şəhidlərin ruhuna ehtiramən sükutla başlayıb. Dekan müavini və çıxış edən tələbələr Vətən müharibəsi, Zəfər günü ilə bağlı məlumat veriblər. Müharibənin gedişi və torpaqların işğaldan azad olunması ilə bağlı iki videoçarx təqdim edilib. Orta Şərq dilləri və ədəbiyyatı kafedrasının dosenti, I Qarabağ müharibəsi iştirakçısı Mehman Tarverdiyev çıxış edərək, birinci və ikinci müharibədə olan reallıqlar, qəhrəman Azərbaycan ordusu, ölkə rəhbərinin başçılığı ilə aparılan hərbi quruculuğun nəticələri barədə, ölkənin yeni imici, bütöv Azərbaycan haqqında fikirlərini ifadə edib, tələbələrə öz ixtisaslarını yaxşı öyrənməyi tövsiyə edib. Fakültənin 90-cı illərdə tələbəsi olmuş, I Qarabağ müharibəsinin şəhidi Muradxan Gözəlovun valideyni Ziyadxan Gözəlov çıxış edərək, şəhidin təhsil illəri, müharibədə keçdiyi döyüş yolu, şəhadətə yüksəlməsi ilə bağlı məqamları təfərrüatıyla danışıb. Vətən müharibəsi qaziləri, fakültənin 2020-ci il məzunu Xəyal Nəbiyev, Məhəmmədəli Baxışov çıxış edərək keçdikləri döyüş yolu, qarşılaşdıqları müharibə səhnələri barədə məlumat veriblər. Zəfər şeiri səsləndirildikdən sonra, tədbir sona çatdırılıb.