Həsənova Gülüstan Qəmbər qızı
13 dekabr 1986-cı ildə Bakı şəhərində anadan olmuşdur. 1993-2004-cü illərdə Bakı şəhəri, Xətai rayonunda yerləşən 264 saylı məktəb-liseydə orta təhsil almışdır. 2004-2008-ci illərdə BDU-nun Şərqşünaslıq fakültəsi Türk dili və ədəbiyyatı şöbəsinin bakalavr pilləsində, 2008-2010-cu illərdə magistr pilləsində təhsil almışdır. Hər iki pilləni fərqlənmə diplomu ilə bitirmişdir. Həsənova Gülüstan Qəmbər qızı 2011-ci ildən 2017-ci ilə kimi BDU-nun Şərqşünaslıq fakültəsi Türk filologiyası kafedrasının dissertantı olmuşdur. O, 2012-ci ildən 2017-ci ilədək Azərbaycan Sahibkarlar (işəgötürənlər) Təşkilatları Milli Konfederasiyasının Beynəlxalq əlaqələr və Biznesin inkişafı şöbəsində müxtəlif vəzifələrdə çalışmışdır. 2017-ci ildə akad. Z.M. Bünyadov adına Şərqşünaslıq İnstitutunda “XX əsrin 40-cı illəri Türk poeziyasında yeni mərhələ kimi” (ixtisas 5717.01 Türk xalqları ədəbiyyatı) mövzusunda dissertasiya işini müdafiə edərək 08 may 2020-ci il tarixində Azərbaycan Respublikasının Prezidenti yanında Ali Attestasiya Komissiyası tərəfindən filologiya üzrə fəlsəfə doktoru elmi dərəcəsini almışdır. 2018-ci ildən 2021-ci ilə qədər Şərqşünaslıq fakültəsinin Türk filologiyası kafedrasında saathesabı müəllim, 2021-ci ildən hal-hazıradək 0,5 ştat müəllim vəzifəsində çalışır. O, 13 elmi əsərin müəllifidir.
Elmi fəaliyyətlə yanaşı tədris prosesində də fəal iştirak edir. Həm bakalavr, həm də magistr pillələrində müxtəlif fənləri tədris edib. Hal hazırda, bakalavr pilləsində Türk dili fənnini tədris edir.